CXXXIX.

1326, November 21. Brieg.

Johannes Schamborii, genannt von Schildberg, schenkt dem Kloster das Patronat seiner Kapelle in (Polnisch-) Steine bei Ohlau.

In nomine domini amen. Quoniam secundum apostolum omnes stabimus ante tribunal Christi, ut referat unusquisque, prout gessit in vita sua sive bonum sive malum, proinde nos Johannes Schamborii dictus de Schiltberch pia intentione considerantes multarum orationum suffragia salubria et alia infinita exercitia bona, que domino deo die noctuque in monasterio Kamencz per fratres eiusdem cenobii cottidie persolvuntur, ut ergo nos et progenitores nostri, necnon et legittimi successores sortem ampliorem bonorum omnium, que in predicto monasterio fiunt, percipiamus in futuro matura deliberatione prius habita de communi consilio fratrum nostrorum ac ceterorum amicorum speciali, insuper nostre dilecte coniugis Sophie voluntate affectuosius accedente in remedium animarum patris nostri . . necnon et matris . . pie memorie simulque animarum patris et matris . . dilecte coniugis nostre Sophie iam prescripte damus et conferimus iuspatronatus capelle nostre site in Stynavia prope Olaviam, monasterio in Kamencz habendum et possidendum cum omni iure et dominio temporibus perpetuis, sicut ipsum possedimus et habuimus ac nostri predecessores pacifice, iuste, debite et quiete; hoc addicientes, quod dominus . . abbas predicti monasterii de Kamencz, qui pro tempore fuerit, semper ibi duos fratres habeat ydoneos et honestos, qui divinum officium ibidem peragant devotione, qua poterint, et laudabili conversatione sint aliis in exemplum. Ut autem hec predicta nostra donatio perpetue robur optineat firmitatis, ipsam capellam cum iurepatronatus supradicto per nostrum caputium duobus fratribus de Kamencz, Tyloni de Felleberch et Tyzconi dicto de Frainkinberch [sic] nomine eiusdem monasterii liberaliter resignamus. Ad evidentiam autem predictorum presentes scribi iussimus et nostri sigilli munimine roborari. Acta sunt hec in Brega apud fratres minores anno domini M°. CCC°. XX°. VI°. in vigilia beate Cecilie presentibus testibus infrascriptis: videlicet Luthero et Nycolao fratribus nostris, domino Witchone nostro capellano in Stynavia, Gunthero de Blankenberch, Borutone iuniore, Henrico de Meldingin et aliis pluribus fide dignis.

Or. Perg. mit dem anhängenden S. des Ausstellers; Pfotenhauer, Siegel S. 34 (B. VIII. 76). Grotefend, Sphragistik S. 20 und 21.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.